Ako nijeste čuli odavno za brend Datsun, nije čudo – oživljen je tek 2012. kada su u Nissanu shvatili da vraćanjem imena i jeftinom proizvodnjom mogu osvojiti nadolazeća tržišta, kao što su Indija, Indonezija, Rusija i Južna Afrika. To su i pokušali da urade sa skromnim modelima poput GO, GO+, on-Do i mi-Do. Tu u pitanju nije nikakav spektakl od automobila, već maleni gradski i jedan minivan, rađeni čak po uzoru i na ruske uzdanice. Do sada su uspjeli da isporuče 100 hiljada jedinica, što nije malo, ali ako se nove najave ostvare – onda će situacija po Datsun biti još bolja.
Koncept GO-cross pojavio se na još jednoj smotri automobila u Indiji, nakon što je premijeru imao početkom novembra u Tokiju. Na prvi pogled je jasno da su u Datsunu (ili Nissanu) svjesni u kojem se pravcu kreće potražnja za automobilima, odnosno za kojim segmentom. Stoga je logičan potez bio crossover modernih linija, za koji obećavaju da je zabavan za vožnju. Da li je ili nije, ne znamo još, jer je tek riječ o konceptu, ali ohrabruje najava da se ovaj model dva puta u manje od pola godine pojavio na dvije izložbe. To bi valjda trebao da bude znak da će uskoro na proizvodnu traku. GO-cross izgleda svježe, sa ogromnom prednjom rešetkom optočenom hromom i zaoštrenim svijetlima, kojih ima i na pretek. “Brzoj” konfiguraciji doprinose i lijepo dizajnirani retrovizori i branici, kao i zadnji dio sa malenim spojlerom.
O performansama nema puno informacija, ali nagađa se da bi GO-cross mogao pokretati neki maleni benzinski motor od 1.2 do 1.6 litara. Za prenos snage bi mogao biti zadužen 5-stepeni manuelni mjenjač. Misija je jasna – vaskrsli brend treba nanovo pokrenuti u punom sjaju i to ciljanjem mlađe generacije, koja je gladna zanimljivih automobila.