Mirotić zaustavio i Vestbruka, Čikago bolji od Oklahome

Nikola se poprilično ispucavao do posljednje četvrtine u jednom momentu imao i 0/7 za tri poena, ali kada je trebalo pogađao je baš kao i Mur pa su njih dvojica u posljednjem dijelu meča iskombinovali čak 27 poena za Bulse koji su zaustavili niz Rasela Vestbruka od četiri tripl dabla. Vestbruk je opet bio blizu ali je meč završio sa 43 poena, osam skokova i sedam asistencija. Ipak u napadu za produžetak ili pobjedu nagazio je liniju auta čime je praktično onemogućio Tanders da stigne do novog trijumfa.

Mirotić je u velikom naporu svog tima da nadoknadi deficit od deset poena u posljednjoj četvrtini, ubacio 26 poena uz osam skokova, ali i samo 33% šuta iz igre (sa slobodnih bacanja 14/16). Tako Nikola u posljednja tri meča ima prosjek od 26 poena po meču od čega čak 13 postiže u posljednjoj četvrtini!

Gasol i Danlivi dodali su po 21 poen, Mur je ubacio 19.

Portland je u drugom meču večeri slavio protiv Dalasa 94:75 uz 17 poena i 12 skokova Oldridža. Petu uzastopnu pobjedu Blejzersi su skupo platili. Metjuz je pokidao Ahilovu tetivu tako da je završio sezonu što je veliki udarac za Portlandove nade u plej ofu!