Ministarstvu fali još 47 inspektora za legalizaciju

Ministarstvo održivog razvoja i turizma trenutno ima 23 građevinsko-urbanistička inspektora, uključujući i glavnu inspektorku i rukovodioce regiona, a potrebno je 70, kazali su Pobjedi iz tog resora.

Od toga, kako su precizirali, za južni region zaduženo je osam inspektora i jedan rukovodilac, za sjeverni dva inspektora i jedan rukovodilac, dok je za centralni zaduženo 10 inspektora.

Kako su Pobjedi ranije kazali, primjena novog Zakona o planiranju prostora i izgradnji objekata zahtijeva i povećanje broja inspektora za urbanizam i građevinarstvo, te će im biti potrebno još najmanje njih 47.

Građevinske inspektore krajem prošle godine Ministarstvo održivog razvoja i turizma preuzelo je od Uprave za inspekcijske poslove.

Kako su tada rekli iz MORT-a, nadležnosti nekadašnje tri inspekcije-zaštite prostora, urbanističke i građevinske-sjedinili su u jednu.