Oahaka, drugačiji Meksiko

Piše

Fransin Proz

Oahaka je jedan od najljepših, istorijski najinteresantnijih i najprijatnijih gradova Meksika.

Nalazi se na sat vremena laganog leta od Sijudad Meksika. Dijelom zbog prijatne klime tokom cijele godine, Oahaka je postala popularno turističko odredište.

Unesko je Oahaku i njene vrhove Sijera Madre del Sura proglasio Mjestom svjetskom nasljeđa. Ovaj kolonijalni grad gdje arheološke ruševine, crkve i muzeji pričaju priču o prošlosti zemlje, nudi koncentrovanu lekciju iz meksičke kulture i kompleksnog nasljeđa, brzi kurs koji je zaslađen živopisnim kućama, prijatnim trgovima i stamenim crkvama-a sve naspram predivnog pustinjskog pejzaža.

Raspoloženje u ovom gradu od 300.000 ljudi je opušteno, saobraćaj je prihvatljiv i turisti nemaju osjećaj da ih prodavci i prolaznici progone.

U Oahaki i njenoj okolini je nekoliko najvažnijih arheoloških nalazišta u Meksiku. Udaljen pola sata vožnje kolima je drevni grad Mitla. Nekada je ovo bio verski centar Zapoteka, civilizacije koja je postojala vijekovima prije Hrista i kasnije, Miksteka, koji su vladali ovom oblašću sve dok ih nisu pokorili španski konkistadori u 16. vijeku.

Na zidovima Mitle, stubovima i prolazima su fragmenti fresaka jarkih boja, kao i raskošni geometrijski mozaici od malih kamenčića koji ih okružuju-to je arhitektonski detalj jedinstven u cijeloj Mezoamerici, oblasti koja obuhvata veći dio Meksika i Centralne Amerike.

U predgrađu je Monte Alban-koji su takođe izgradili Zapoteci i koji potiče iz 500. prije nove ere. U pitanju je veliki kompleks piramida, palate, svetilišta, igrališta, prepun bareljefa.

U samoj Oahaki, naročito u brdovitom, kaldrmom popločanom istorijskom centru, nalazi se desetak crkava.

Bez sumnje najljepša je Templo de Santo Domingo de Guzman, koju su podigli dominikanski fratri u 16. i 17. vijeku. Crkva ima pozlaćenu unutrašnju dekoraciju sa tavanicom ukrašenom figurama jarkih boja, uključujući i živopisnu predstavu porodičnog drveta Santo Dominga koja podsjeća na pretkolumbovske predstave Drveta života.

Oahaka je takođe mjesto u kome mogu da uživaju i oni kojima arheologija, istorija, arhitektura i umjetnost nisu pretjerano interesantne. Grad je predivno mjesto za šetnju, kupovinu i jelo.

Najnaseljeniji dio Oahake je pijaca “20. novembar”, koja se nalazi nekoliko blokova od Zokala, glavnog trga. Na njoj se mogu naći začini, čokolada, povrće, tropsko voće, pa čak i lokani delikates-prženi skakavci.

Na pijaci možete uživati u prizoru blistavih boca meskala sa naljepnicama koje reklamiraju da dolaze iz malih, lokalnih destilerija. Agave od kojih se meskal pravi, rastu u Oahaka dolini i jedan su od najvažnijih useva.

Oahaku okružuju farme agave sa redovima te biljke koja liči na mješavinu aloje i peruški ananasa. Putnici mogu da probaju agavu (čistu ili u raskošnim koktelima) u jednom od brojnih meskal barova.

Jedan od najpopularnijih restorana je “Los Dansantes”. U prostranom dvorištu zasvedenom ogromnim providnim platnima koja se noću skidaju, turisti mogu da uživaju u opuštenom i elegantnom restoranu.

Među popularnim jelima su mali tartar bifteci od tunjevine, čili sa kukuruzom, zeleni list koji pomalo ukusom podsjeća na šiso lišće, koji se služi uz lokalni bijeli sir, svinjska rebarca i račiće u kokosu.

Od svih suvenira-kostura koji se prodaju za Dan mrtvih, slamnatih maski i torbi od jute-moj omiljeni je čokolada po kojoj je Oahaka poznata.

Šolje vruće čokolade podižu raspoloženje zimi ili bilo kad.