Trener Rome Euzebio Di Frančesko vjeruje da njegova ekipa može napraviti još jedno čudo u Ligi šampiona.
“Vučica” je u četvrtfinalu na Olimpiku srušila Barselonu sa 3:0, a sličan scenario je Rimljanima potreban i u susretu sa Liverpulom, nakon sinoćnjeg neuspjeha na Enfildu (2:5).
“Rekli smo pred meč sa Barselonom da smo vjerovali u prolaz dalje i isto kažem sada. Danas je ekipa izgubila samopouzdanje i bili smo potpuno rasformirani. To nije smjelo da se dogodi koliko god smo golova primili. Vidjećete drugačiju Romu u sljedećem meču. Gubili smo gomilu duela na svakom dijelu terena, lako smo prodavali lopte i njihovi napadi su uvijek dolazili kada smo im mi lako dali loptu”, istakao je Di Frančesko.
Dva gola u finišu daju nadu italijanskom predstavniku.
“Bili smo mrtvi ali sada imamo malo života i moramo da iskoristimo način igre kakav smo imali protiv Barselone. Moramo da vjerujemo i da se nadamo. Sa našim navijačima mislim da će Liverpulu biti teško na ‘Olimpiku’. Ne trebaju nam čuda već samo da vjerujemo. Ovo je prvo polufinale za Romu poslije tri decenije, nismo baš navikli ali da vas podsjetim: ovaj duel nije gotov. Ko god da ne vjeruje u preokret neka ostane kod kuće. Osjećam se odgovornim ali i dalje smo u polufinalu”, zaključio je Di Frančesko.
Roma će dočekati Liverpul 2. maja.
L.Đ.
