Vembli je spreman, a tamo će se naći Šefild junajted i bolji iz duela Sanderlend – Koventri.
Šefild je izborio plasman u finale baraža za ulazak u Premijer ligu, nakon što je u polufinalu ukupnim rezultatom 6:0 savladao Bristol Siti.
Nakon što su u prvom meču u Bristolu slavili sa 3:0, fudbaleri Šefilda istim rezultatom su trijumfovali i na svom Bramal Lejnu, za ukupnih 6:0. Strijelci su bili Kifer Mur (41), Gustav Hamer (52) i Kalum O’Hir (83).
Šefild Junajted će pokušati da se vrati u Premijer ligu u finalu koje će se igrati 24. maja na Vembliju, protiv pobjednika duela između Sanderlenda i Koventri Sitija. U prvoj utakmici Sanderlend je slavio u gostima rezultatom 2:1, a revanš se igra danas na stadionu Svjetlosti.
Šefild je ispao iz Premijer lige na kraju prošle sezone, nakon što je ostvario samo tri pobjede u 38 kola.
Ove sezone završili su na trećem mjestu u Čempionšipu, iza Lids junajteda i Barnlija, koji su direktno izborili promociju.
Sam ulazak u Premijer ligu klubovima donosi najmanje oko 150 miliona eura, bez dodatne zarade od prodaje ulaznica, suvenira i drugih prihoda.
