Nema primanja problematičnih u EU, Sjeverna Makedonija možda prestigne Srbiju

Evropski komesar za proširenje i politiku susjedstva Johanes Han ponovio je danas u Beču da bez rješenja bilateralnih problema nema članstva u EU.

Ujedno je naglasio i da je Sjeverna Makedonija pozitivan primjer u regionu da se problemi mogu riješiti, a sjeverno-makedonski premijer Zoran Zaev istakao je da bi rješenje koje su Skoplje i Atina pronašli za dugogodišnji spor mogao biti ohrabrenje Beogradu i Prištini da nastave dijalog.

Han je, govoreći na skupu “Nove perspektive Sjeverne Makedonije” u organizaciji Bečkog ekonomskog foruma (VEF), kazao da je trenutno Sjeverna Makedonija jedina zemlja na Zapadnom Balkanu koja nema sporove sa susjedima i da je time stabilnija od ostalih dijelova regiona.

“Stalno me pitaju ko će prvi pristupiti EU, a moj odgovor je uvijek isti – radi se o procesu zasnovanom na zaslugama, o regata principu i brzina pristupa zavisi od toga ko najbrže napreduje na tom putu. Počeli smo pregovore sa Srbijom i Crnom Gorom i trenutno te zemlje su formalno najnaprednije na ovom putu, ali to ne isključuje mogućnost da će Sjeverna Makedonija uspjeti da nadoknadi zaostatak koji ima, jer je jedina zemlja koja nema nijedan bilateralni spor sa susjedima. U strategiji Evropske komisije za Zapadni Balkan smo jasno rekli da prihvatamo nove članice samo ako nemaju bilateralne konflikte. Nismo spremni da uvozimo konflikte”, poručio je on.

Ukazao je da u Sjevernoj Makedoniji postoji i politička stabilnost, jer je opozicija spremna na dijalog u skupštini, što bi, kako je konstatovao, želio i drugim zemljama regiona.

“U poređenju sa drugima situacija u Sjevernoj Makedoniji je bolja, jer se tamo opozicija ponaša kao prava opozicija, konstruktivna je i učestvuje u parlamentu u političkom životu, na način kako se očekuje u jednoj zreloj demokratiji. Posljednji predsjednički izbori su dokazali da je moguće zajednički napredovati”, objasnio je Han.

Rekao je da je taj napredak urodio plodom i da najprije predstoji pristup Sjeverne Makedonije NATO, što bi, kako je dodao, trebalo da se dogodi do iduće godine.

To jeste važan korak, ali, kako je konstatovao, još važniji je drugi korak, a to je evropska perspektiva.

Izrazio je nadu da će uspjeti da uvjeri skeptične članice da se otvore pristupni pregovori sa Skopljem što prije, i kazao da je uvjerenje da će to uslijediti još prije ljeta, te da će prva poglavlja moći da se otvore do kraja godine.

Najavio je da će se, u skladu sa novom metodologijom, otvoriti poglavlja 23 i 24, koja će biti i posljednja zatvorena u pristupnom procesu. Ukazao je da su ta poglavlja važna i da njihovo otvaranje podstiče investicije, a kao primjer je naveo Srbiju.

“U Srbiji smo nakon otvaranja tih poglavlja vidjeli više ne samo evropskih već međunarodnih investicija, jer je postojala veća sigurnost pravnog razvoja i okruženja nego ranije”, objasnio je Han.

On je istakao da je najveći izazov u regionu odliv mozgova i da to treba spriječiti kroz osnaživanje ekonomije, kreiranje radnih mjesta i većom perspektivom.

Takođe je ukazao da, iako svi govore o Kini i Rusiji u regionu, najveći investitor je, po broju firmi, ipak EU, a i Austrija.