Samo najsmjeliji posjećuju hotel koji se svake godine gradi i ruši u Švedskoj

U Švedskoj se još od 1989. svake godine gradi ledeni hotel u selu unutar Arktičkog kruga. “Dvadeset osmi ledeni hotel” napravljen je i ove godine i izgleda poput ledenog kraljevstva.

Hotel je otvoren ovog mjeseca u Laponiji, a gostima nudi prenoćište u sobama i apartmanima u potpunosti izgrađenim od leda.

Ukrašen je unikatnim djelima lokalnih umetnika, a ima i ledeni bar, salu za ceremonije i zaleđeno igralište za djecu.

Na konstrukciji je radilo 36 umjetnika iz 17 zemalja, prenosi “Dejli mejl”.

Gostima je na raspolaganju mnogo toplih prekrivača i odjeće, kako bi im boravak bio što prijatniji, ali treba imati na umu da je temperatura u sobama i apartmanima konstantna i iznosi minus pet stepeni Celzijusa.

U svakoj sobi se nalaze impresivne skulpture, a hotel se nalazi 200 kilometara sjeverno od Arktičkog kruga. Gradi se svake godine i to onda kada se zaledi rijeka Torne. “Materijal” je upravo led iz te rijeke, a za izgradnju hotela je potrebno 1.000 tona leda.

Svaka prostorija ima jedinstven izgled, a i okolina je zaista nevjerovatna. Hotel nudi bogat program zimskih aktivnosti, među kojima je i vožnja sankama.

Hoteli napravljeni od leda postali su popularni u proteklih nekoliko godina, a posjećuju ih turisti željni jedinstvenog zimskog odmora.

Ž.N.