Australijski student uhvaćen u špijunaži u Sjevernoj Koreji

Sjevernokorejski državni mediji objavili su da je australijski student Alek Sigli uhvaćen u špijunaži.

To je dovelo do njegovog protjerivanja iz Sjeverne Koreje, prenosi Rojters.

“Istragom je otkriveno da je on, na podsticaj (američkog sajta sa sjedištem u Seulu) “NK njuz” i drugih medija usmjerenih protiv Narodne Demokratske Republike Koreje, u više navrata predao podatke i fotografije koje je prikupio i analizirao pretražujući Pjongjang, pri čemu je koristio identifikacioni karticu namijenjenu stranim studentima”, objavila je sjevernokorejska državna agencija KCNA.

Navodi se da je Sigli, kojeg su vlasti u Sjevernoj Koreji držale u pritvoru od 25. juna, priznao “špijunsko djelovanje” i više navrata zatražio pomilovanje.

KCNA je navela da je Sigli u četvrtak protjeran iz Sjeverne Koreje.

On je istog dana preko Pekinga stigao u Tokio.