Muzika film i TV

Mile Kekin: Prvi automobil u životu je simbol prave slobode

Mile Kekin, tekstopisac i frontmen zagrebačkog benda Hladno Pivo, napisao je mnogo pjesama, a fanovi će ove godine imati priliku da čuju novih deset. Na pjesmama koje će se naći na njegovom solo albumu Mile već vrijedno radi u studiju u Novom Mjestu, a u svemu ima podršku kolega iz Hladnog piva.

“Razlog izleta je što sam htio da radim s novim ljudima, da istražujem nove žanrove, skupim nove ideje, napravim nešto svoje, a ne bendovsko. Mislim da je to prirodno i potrebno svima onima koji se bave nekim kreativnim zanimanjem”, rekao je Mile.

Prva pjesma koju predstavlja i za koju je već objavio teaser je autobiografska, a govori o njegovom prvom automobilu “Reno 4”.

U razgovoru za Klix.ba Mile kaže kako je prvi automobil koji je samo tvoj i ničiji prelomni trenutak u životu, jer ti se otvaraju prostranstva koja ne pokriva gradski prevoz.

“To je simbol prave slobode. S njim sam prvi put izgubio vozačku, u njega se zabila nova novcata Mazda i slupala se skroz, a ja sam prošao bez ogrebotine. Taj automobil je bio neobična verzija Renoa koja je bila pola metra duža pa sam unutra radio i tulume studentske. Sjećam se da su me zaustavili u Njemačkoj na autoputu jer sam bio prespor što nijesam skužio jer mi brzinomjer nije radio”, rekao je Mile.

Na svom Facebook fan pageu Mile je napisao kako se vjerovatno počeo baviti muzikom zbog “samoće uzrokovane prečestim selidbama”.

“Muzika me spasila od samoće na brdu koje isto spominjem u pjesmi. U teškim trenucima mi je pomogla više od svega pa sam srećan da se njome mogu baviti non stop”, rekao je.

Mile ima i podršku kolega iz benda koji će na Facebooku objaviti njegov prvi singl.

“To mi naravno puno znači jer sam u solo izdanju puno sitnija riba”, priznao je Mile.

Solo album planira da završi do 11 mjeseca ove godine, a sljedeću godinu obilježiće velika turneja povodom trideset godina Hladnog piva.

Send this to a friend