Voditeljka i komičarka Elen Dedženeris u nedavnom je intervjuu s Dejvidom Letermanom otkrila da je očuh seksualno zlostavljao kad joj je bilo samo 15 godina.
Ispričala je kako je hvatao za grudi tvrdeći da provjerava da li ima kvržice, a kad je to rekla majci koja je bolovala od raka, ona joj nije vjerovala, pa je s očuhom ostala u vezi punih 18 godina.
“Dok je bila na putu, rekao mi je da je pronašao kvržicu na njenim grudima i da mora da opipa i moje kako bi ih provjerio. Tada još nisam znala ništa o ljudskom tijelu, čak ni to da nisu sve grudi iste, pa je uspio da me uvjeri”, rekla je Elen, prenosi Index.hr.
Dodala je da je to više puta pokušavao da ponovi.
“Jednom je probao da provali u moju sobu, pa sam razbila prozor i pobjegla. Nisam htjela to da kažem mami jer sam željela da je zaštitim, a znala sam da bi je tako nešto unesrećilo”, kaže.
Kad je najzad rekla majci šta se događa, ona joj, tvrdi Elen, nije povjerovala, pa je s njim u vezi ostala 18 godina. Na kraju je ipak shvatila i ostavila ga.
“Ljuta sam na sebe jer sam bila preslaba da bih se tome usprotivila. Imala sam samo 15 ili 16 godina. To je stvarno užasna priča, ali govorim o njoj kako više nijedna djevojčica ne bi kroz to prolazila. Nije trebalo da štitim majku, trebalo je da zaštitim sebe. Kad sam joj rekla, nije mi vjerovala. Povjerovala je tek kad je mnogo puta promijenio svoju verziju priče. Onda ga je ostavila. Danas joj je jako žao zbog svega”, ispričala je voditeljka.
