Liza Holzli, mama iz Pensilvanije nedavno je na Fejsbuku objavila priču o tome kako su se njena djeca Noah i Abigail igrali. Međutim, igra se nije završila onako kako su očekivali, prenosi Direktno.
Noah i Abigail igrali su se u podrumu s malenim igračkama nalik na čičak, s kojima mogu da se prave razni oblici.
Tokom igre, Noah je istresao punu kutiju tih čičaka sestri na glavu.
“Mislim da sam skoro iskočila iz vlastitog tijela. Abigail je imala oko 150 malenih ježića u svojoj kosi. Kada smo pokušali da ih uklonimo samo smo pogoršali stvari jer se sve zapetljalo”, rekla je mama Liza kojoj je trebalo tri sata kako bi ćerki izvadila samo 15 čičaka iz kose.
Kad se njen suprug Dan vratio kući, zajedno su istraživali kako da izvuku igračke iz kose. Brzo su shvatili ‘ozbiljnost’ situacije.
“Preporučuje se korišćenje regeneratora i biljnog ulja, ali i to je samo pogoršalo situaciju”, kaže Liza.
Dan je uspješno uklonio još 10 ježića s Abigailine glave, bilo je gotovo jedan poslije ponoći i porodica je riješila da ide na spavanje.
Liza je rekla Abigail da spava na stomaku da joj se kosa ne bi još više zapetljala.
Sjutradan Liza je kupila ulje za kosu i češalj za raspetljavanje. Poslije puno suza, gubitka kose i 20 sati izvlačenja ježića, sve je napokon bilo gotovo.
“Osjećam da su naše molitve uspjele, jer je ovo bilo čudo. Spasili smo njenu kosu i iako je rjeđa, nije bila toliko oštećena i uništena kao što sam mislila”, napisala je Liza na Fejsbuku.
Rekla je da su joj prsti ‘doslovno natečeni’ od ovog bolnog iskustva, ali zahvalna je što je ta grozna situacija napokon gotova, piše People.
