Izgleda da izvinjenje koje je Vil Smit nakon nekoliko mjeseci nedavno uputio komičaru Krisu Roku, a u kom pokušava da ublaži posljedice skandala kada ga je ošamario prilikom dodjele Oskara, neće uroditi plodom kod žrtve.
Nekoliko sati nakon što se Smit pojavio na društvenim mrežama da se izvini, Kris Rok je u okviru stendap večeri u Atlanti na sebi svojstven način objavio neku vrstu reagovanja, pritom uporedivši Smita sa rep mogulom Merionom Najtom, čiji je nadimak “Suge” (Sjudž), a 2018. osuđen je na 28 godina zatvora za ubistvo iz nehata, piše Page Six.
“Svi pokušavaju da budu je*ene žrtve. Ako svi tvrde da su žrtve, onda niko neće čuti prave žrtve. Čak i mene je Suge Smit udario… Otišao sam na posao sljedećeg dana. Svako ko izgovori riječi – boli, nikada nije bio udaren u lice“, dodao je Rok.
Podsjetimo, sporni šamar nastao je nakon Rokove šale na račun Vilove supruge Džejde Pinket Smit i njene ćelavosti, koja je odraz zdravstvenog problema.
“Tada mi je bila pomućena svijest. Poslao sam Krisu poruku i dobio odgovor da još uvijek nije spreman da razgovara i da će mi se, kada bude spreman, javiti. Tako da ću ti reći ovo Krise – izvini. Moje ponašanje je bilo neprihvatljivo i tu sam kada god budeš htio da razgovaraš“, poručio je Smit.
