U velikom derbiju Londona i 20. kola Premijer lige Totenhem je na Vajt Hart Lejnu savladao Čelsi sa 2:0.
“Pjevci” su tako uspjeli da prekinu niz nepobjedivosti izabranika Antonija Kontea i vrate neizvjesnost u šampionsku trku.
Junak Totenhema je Dele Ali, momak koji u posljednje vrijeme igra u izvanrednoj formi. Engleski reprezentativac postigao je oba pogotka i to glavom.
Prvi je stigao u nadoknadi prvog dijela. Eriksen je uputio centaršut s desne strane, a Dele Ali koristi lošu komunikaciju Mozesa i Aspilikuete.
Gol za 2:0 je pao na gotovo identičan način. Ponovo je danski internacionalac poslao upotrebljivu loptu u kazneni prostor Čelsija, a Dele Ali još jednom zatresao mrežu rivala. Igrao se 54. minut.
“Plavci” su na ovoj utakmici bili poprilično anemični, a jedinu pravu priliku stvorili su na početku drugog poluvremena, ali je Azar loše reagovao.
Totenhem je ostvario petu uzastopnu pobjedu u Premijer ligi, a u posljednje četiri utakmice Dele Ali je postigao čak 7 golova.
Čelsi je na vrhu tabele ostao na 49 bodova, ima pet više od Liverpula, a sedam od Totenhema i Mančester Sitija.
