Trener Napolija Karlo Anćeloti ne gubi nadu u plasman ekipe u polufinale Lige Evrope.
Italijanski predstavnik je sinoć na Emirejtsu izgubio od Arsenala rezultatom 2:0.
“Naravno da vjerujem u prolaz! Znamo kakvu podršku imamo na našem stadionu, kakvu atmosferu prave naši navijači. Uradićemo sve da nadoknadimo ovaj minus”, izjavio je Anćeloti.
Mrežu Napolija u Londonu tresli su Aron Remzi i Kalidu Kulibali, koji je dao autogol.
“I jedan i drugi gol primili smo zbog individualnih grešaka. Najprije je bilo loše dodavanje, a zatim nismo uspjeli da iskontrolišemo pritisak. Jako loše smo igrali u prvom poluvremenu. U drugom je bilo bolje, imali smo nekoliko šansi. Sad nam preostaje 90 minuta da ispravimo sve”, zaključio je iskusni strateg.
Revanš meč na stadionu San Paolo igra se idućeg četvrtka od 21 čas.
