Najbrži čovjek na planeti neće nastaviti fudbalski put na Malti Jusein Bolt je odbio Valetu za koju igra naš 32-godišnji centarfor Bojan Kaljević!
Tridesetdvogodišnji atletičar je na stolu imao ugovor na dvije godine, ali osvajač osam zlatnih medalja sa Olimpijskih igara i 11 najsjajnijih odličja sa Svjetskih prvenstava nema namjeru da pojača ekipu koja je osvojila 24 titule na Malti.
“Bolt neće ići na Maltu, odbio je ponudu Valete i ta priča je gotova! Pred nama je još mnogo ponuda. Mnogi se interesuju za njega”, rekao je menadžer sjajnog Jamajčanina, Riki Sims, na čije se riječi nadovezao izvršni direktor Valete Gaston Slimen.
“Juseinu želimo sve najbolje u fudbalskoj karijeri, a naša ponuda za njega je u svakom trenutku otvorena. Stoji na stolu”, jasan je Slimen.
Bolt je nakon prestanka bavljenja atletikom (u avgustu prošle godine) riješio da se posveti fudbalu, trenirao je sa Borusijom iz Dortmunda i norveškim Stremsgodsetom, da bi svoj prvi pogodak postigao nedavno za australijski Central Koust Mariners.
Vižljasti Jamajčanin je kao napadač postigao dva gola za Marinerse na prijateljskom meču protiv Makartura (4:0), a pošto je odbio Valetu, sve su prilike da čeka ugovor australijskog prvoligaša.
Australijska A 1 liga počinje u petak, Marinersi prvi meč igraju u nedjelju protiv Brizbejna na strani, a Bolt tada sigurno neće biti na terenu. Ako dobije profesionalni ugovor mogao bi da zaigra tek u januaru, kada će klubovi ponovo moći da registruju nove igrače.
