Duel Atalante i Pari sen Žermena proteći će bez nekih vrlo bitnih igrača za dva tima.
Nakon što je PSŽ praktično izvjesno ostao bez Kilijana Mbapea za taj meč problem se stvorio i Atalanti.
Trener Đan Pjero Gasperini požalio se nakon pobjede protiv Parme.
“Šteta je da u odlučujućem dijelu sezone igramo bez ključnih igrača. Mjesecima nema Duvana Zapate, sada je Iličić van tima i sve je manje šansi da bude spreman za Ligu šampiona”, kazao je popularni Gasp i dodao:
“Biće vrlo teško da se spremi. Tim radi dobro da se prilagodi i pronađe novi balans, zato što imamo igrače koji mogu to da rade, kao što su Pašalić, Gomez i Malinovskji.”
Gasperini je pričao i o važnosti koju Iličić igra.
“Iličić je fundamentalan za nas. Bila je ovo njegova sezona sve do marta, bio je fenomenalan. To je kao da Juventus igra bez Dibale ili Lacio bez Imobilea”.
