Inter je sinoć odbranio trofej u Kupu Italije, savladao je Fiorentinu 2:1 na rimskom Olimpiku i stigao do četvrtog pehara od kada ga vodi Simone Inzagi.
Bivši trener Lacija je sa “crno-plavima” za dvije sezone osvojio po dva pehara u Kupu i Superkupu, a 10. juna ima šansu da dođe i do petog, najvećeg – Inter protiv Mančester sitija igra finale Lige šampiona.
“Velika je ovo sezona za nas, ali još nije završena”, rekao je Inzagi.
Interu je trofej donio dvostruki strijelac Lautaro Martines, iako je “viola” vodila od 3. minuta i gola Nika Gonsalesa.
“Lautaro je bio fenomenalan, ali i ostatak ekipe. Nismo počeli dobro utakmicu, pristup nije bio dobar, ali smo brzo postavili stvari na svoje mjesto”, istakao je Inzagi.
On je u karijeri nastupio u osam finala u Kupu i Superkupu, dobio je sedam.
