Za kraj prilično sumorne 2024. godine, košarkaše Mornara u ponedjeljak čeka gostovanje Igokei, u okviru 15. kola ABA lige.
Zahtjevan duel je pred Baranima i teška misija da u tekućoj sezoni ostvare tek drugi trijumf.
“Uvijek nam je drago otići kod naših prijatelja iz košarkaškog kluba Igokea, to prijateljstvo datira od kad smo članovi ABA lige. Prijateljstvo van terena, na terenu, zna se, toga nema, već pobjeđuje onaj ko je bolji“, poručio je trener Mornara, Mihailo Pavićević.
Barani pred ovo gostovanje imaju samo jednu pobjedu, pa je okštaj u Laktašima veoma bitan za našeg predstavnika.
“Na svim pozicijama su pokriveni sa iskusnih, provjerenim igračima. Tu su još dodali par mladih igrača, koji su dobro uklopljeni. Dobro vođena ekipa ekipa i sigurno da nas čeka mnogo teško iskušenje“, istakao je Pavićević i dodao:
“Ne možemo ništa unaprijed reći, samo ću od svojih igrača tražiti ono što i od početka sezone, da daju sve od sebe. Da pokušamo da sprovedemo ono što radimo, što treniramo. Za sada to nije bio slučaj, ali radimo na tome i nadam se da ćemo brzo i to uspjeti. Igokea je apsolutni favorit, ako bi uspjeli da ih iznenadimo, za nas bi bila ogromna stvar, ali to neće biti nimalo lako“, zaključio je Pavićević.
Duel Igokea – Mornar je sjutra od 12 sati.
