Prvi meč bio je igra mačke i miša, drugi bi morao biti koliko-toliko neizvjesniji – Budućnost Voli u nedjelju dočekuje Mornar u meču 16. runde ABA lige.
Na premijeri regionalnog takmičenja “plavi” su deklasirali Barane 98:51, s tim što treba napomenuti da je tim Mihaila Pavićevića u taj meč ušao nakon svega desetak dana priprema.
Mornar ni do danas nije u značajnoj mjeri popravio igru i rezultate, nalazi se na začelju tabele sa samo jednom pobjedom.
Budućnost je u odličnom ritmu u ABA ligi, s obzirom da se sa beogradskim evroligašima bori za prvo mjesto pred plej-of.
“Prvo, najbitniji je naš pristup – već smo pričali o tome sa igračima i to je uslov za sve ostale stvari. Da pokažu karakter, profesionalnost najbitnije, a onda tek dolaze taktika i dogovor”, kazao je slovenački stručnjak.
Njegov tim je stigao da se odmori barem jedan dan nakon poraza od Bahčešehira u Istanbulu.
“Mi se spremamo kao protiv svakog tima do sada. Moramo da se regenerišemo, mislim odmorili smo jedan dan, i sad maksimalan fokus na Mornar, koji ako mu dozvoliš zna da igra, ima kvalitetne individualce. Pokazali su to protiv Igokee i Splita, tako da zahtijevam maksimalnu koncentraciju i da opravdamo ulogu favorita”, kazao je Slovenac.
Susret Budućnosti Voli i Mornara je u nedjelju od 17 časova.
