Predsjednik Sjedinjenih Američkih Država Donald Tramp izjavio je danas da je spreman da pomogne i bude posrednik u potpisivanju konačnog mirovnog sporazuma između Palestinaca i Izraelaca.
Tramp je na konferenciji za novinare uoči razgovora s palestinskim predsjednikom Mahmudom Abasom u Bijeloj kući rekao da Izraelci i Palestinci moraju raditi zajedno na postizanju dogovora, koji, kako je rekao Tramp, ne može biti nametnut.
“Spreman sam da vam pomognem i budem posrednik. Ali, vi morate da se dogovorite. Palestinski lideri moraju jednim glasom osuditi nasilje i mržnju”, rekao je Tramp obraćajući se Abasu kojeg je podsjetio da je on u Bijeloj kući potpisao prvi mirovni sporazum sa Izraelom. Izrazio je nadu da će Abas potpisati konačni dogovor.
Tramp je rekao da mir znači i pobjeda nad terorističkim organizacijama kao što je ISIL, te je pohvalio saradnju bezbjednosnih službi Izraela i Palestine.
Abas se, sa druge strane, založio za rješenje koje predviđa dvije države, pri čemu bi Istočni Jerusalim bio glavni grad Palestine. On je izrazio uvjerenje da Tramp može pomoći da se postigne dugo očekivani mir.
“Vi imate predanost i želju da sve dobije svoj plod i da bude uspješno”, rekao je Abas.
Tramp je najavio da će s Abasom razgovarati i o ekonomskoj saradnji, razvoju privatnog biznisa, zapošljavanju vladavini prava što su, kako je rekao, ključna pitanja važna za postizanje mira
