Human gest vatrogasaca: Napunili isušeno pojilo za konje u Fundini

Da vatrogasci ne gase samo požare, i da su uvijek tu da pomognu građanima, dokazali su bezbroj puta. Ovog puta mještani Fundine obavijestili su podgoričku Službu zaštite i spašavanja, da je 50 konja na tom prostoru ostalo bez vode. Nakon dojave, oni su izašli na teren i pojilo napunili potrebnom vodom.

Iz Centra za zaštitu i proučavanje ptica Crne Gore, oduševljeni ovim gestom su poručili da je nevjerovatan osjećaj znati da Podgorica ima službu kojom se može ponositi.

“Na poziv mještana Fundine da je 50 konja sa svojim čupavim malcima, usljed velikih vrućina i suše ostalo bez vode, iznenadismo kao ‘ptičari’ vatrogasnu službu apelom za pomoć. Na naše oduševljenje bez pogovora su izašli na teren i isušeno prirodno pojilo napunili prijeko potrebnom vodom još jednom pokazavši koliko human posao rade i kako sva bića imaju jednak tretman”, napisali su iz CZIP-a na svojoj FB stranici.

Ističu da ih je ovaj slučaj podsjetio na postupanje ove službe i prošle godine kada je smuk uklonjen iz KBC-a sa potrebnom pažnjom i stručnošću, na vrlo edukativan način.

“Dragi vatrogasci, poštovani komandire Čađenović, želimo vam mirnu sezonu, a pored nas i mještana, zahvalne su vam i desetine snažnih sapi, razbarušenih griva i plemenitih očiju”, poručili su oni.