Jirgen Klop nije imao šta da zamjeri svojim igračima nakon remija bez golova na Enfildu u susretu sa Mančester junajtedom.
“Redsi” su uoči meča bili apsolutni favoriti, na terenu su pokazali dominaciju, ali je efikasnost izostala.
“Vidio sam mnogo dobrih stvari, jedino što mi se ne dopada je rezultat. Morali smo da postignemo gol. Žurili smo u pojedinim napadima, ali mi se dopao intenzitet igre od samog početka. Svi su vidjeli da smo željeli pobjedu, naš presing je bio dobar, nismo im dali da izađu. Ne sjećam se da smo bili tako dominantni protiv Junajteda, čak ni na tih 7:0. Oni se sa 0:0 osjećaju sigurno bolje od nas. Idemo dalje s tim bodom”, kaže Klop i dodaje:
“Brojke koje smo imali što se tiču šuteva su blesave. Ipak, moralo je više biti u sam okvir. To je bio naš propust danas”, zaključio je Klop.
Liverpul je drugi nakon 17 kola, ima 38 bodova, što je jedan manje od vodećeg Arsenala.
